Fahamu Silaha nne ambazo Hamas inazitumia kupigana na Israel

Kundi la wanamgambo wa Hamas linatumia silaha za hali ya juu katika vita vyake dhidi ya Israel, Uchunguzi wa kitaalamu wa BBC Arabic umegundua.

Wataalamu wa masuala ya kijeshi wanasema baadhi ya silaha zinazotumiwa zimefanyiwa marekebisho na kuwa hatari zaidi ikilinganishwa na mashambulizi ya awali.

Tarehe 7 Oktoba, Hamas ilivuka Gaza na kuingia Israel katika shambulio ambalo halijawahi kushuhudiwa ambalo lilihusisha kurusha mamia ya roketi na makombora, kutumwa kwa ndege zisizo na rubani zenye vilipuzi, na utumiaji wa idadi isiyojulikana ya silaha ndogo na risasi.

Iliua Waisraeli 1,200 na kuwachukua mateka zaidi ya 240 kurudi Gaza. Tangu wakati huo, mashambulizi ya anga ya Israel na uvamizi wa ardhini huko Gaza yamesababisha vifo vya zaidi ya Wapalestina 23,000.

BBC News Arabic imetambua silaha nne zinazotumiwa na Hamas na tawi lake la kijeshi, Brigedi ya al-Qassam, ambazo zimezua maswali kuhusu uwezo wake na jinsi inavyonunua sehemu za kuunda silaha hizo.

Jeshi la Israel (IDF) linasema kuwa limewaua wapiganaji 8,000 wa Hamas, idadi inayopingwa na kundi hilo, ambalo limetangazwa kuwa shirika la kigaidi na Uingereza na nchi nyingi za Magharibi. Israel inasema wanajeshi wake 187 wameuawa huko Gaza kufikia sasa.

1. Kombora la kushambulia vifaru la 'Yasin 105'

Kombora la Yasin 105mm la kuzuia vifaru limeonekana kwenye video mbalimbali zilizoshirikiwa na al-Qassam Brigades tangu kuanza kwa mashambulizi ya ardhini ya Israel, ambapo linaonyeshwa likilenga vifaru vya Israel Merkava huko Gaza.

Kombora hilo limepewa jina la Sheikh Ahmed Yasin, marehemu mwanzilishi wa vuguvugu la Hamas, na linarushwa kutoka (RPG) lililoundwa na Urusi.

CHANZO CHA PICHA,AL-QASSAM BRIGADES

Maelezo ya picha,

Video hii ya Al-Qassam Brigades inasema inaonyesha kombora la Yasin 105 linalotumika Gaza mnamo Oktoba 2023.

Brigedia Jenerali wa zamani wa jeshi la Misri, Samir Ragheb, anasema muundo wa vichwa viwili vya Yasin 105 ni uvumbuzi muhimu.

Chaji ya kwanza ya mlipuko inalenga silaha za tanki, kuruhusu kuingia kwa sehemu au kamili, wakati chaji ya pili inahakikisha kupenya kamili ndani ya tanki, kuilipua, anasema.

Philip Ingram, afisa wa zamani wa ujasusi wa jeshi la Uingereza, anasema masafa madhubuti ya kombora hilo ni 150-500m, na kasi ya juu ya mita 300 kwa sekunde.

Pia anasema usahihi unaohitajika kwa muundo huu wa vichwa viwili vya vita unaonyesha uwezo wa juu wa kutengeneza silaha wa Hamas.

Vifaru vya Israel vina mfumo wa kuzuia makombora yanayopenyeza anaongeza.

Lakini kumekuwa na taarifa kwamba mfumo wa Israel umetatizika na kombora la Yasin. BBC News Arabic haijaweza kuthibitisha hili.

Wataalamu wa kijeshi wanakadiria kuwa Hamas ina hifadhi kubwa ya angalau makombora 2,000 ya Yasin 105.

CHANZO CHA PICHA,AL-QASSAM BRIGADES

Maelezo ya picha,

Video ya al-Qassam iliyotolewa mnamo Oktoba 2023 inayoonyesha hifadhi yake ya makombora ya Yasin 105

2. Topido ya 'Al Asef'

Katika video iliyotolewa na Hamas mwishoni mwa Oktoba, kundi hilo la wanamgambo lilionyesha silaha mpya, 'Al Asef' silaha , ambayo walisema waliitumia katika shambulio la Oktoba 7.

BBC News Arabic imethibitisha kuwa video hii haikuwekwa mtandaoni hapo awali.

Wataalamu wanasema silaha hii ni gari lisilo na rubani au linaloendeshwa kwa mbali chini ya maji, iliyoundwa kwa ajili ya shughuli za chini ya maji.

CHANZO CHA PICHA,AL-QASSAM BRIGADES

Maelezo ya picha,

Brigedi za al-Qassam pia zilichapisha video hii mnamo Oktoba 2023 inayoonyesha topido ya 'Al Asef'

Yasser Hashem, mkuu wa zamani wa majeshi katika jeshi la Misri, anaelezea silaha kama "gari rahisi chini ya maji linaloweza kuzama chini ya maji bila wafanyakazi".

Anaangazia mabadiliko yake katika kutekeleza majukumu mbalimbali ya chini ya maji, ikiwa ni pamoja na uchoraji wa ramani, ufuatiliaji, ukaguzi wa miundo iliyozama, ufuatiliaji wa mazingira, na shughuli za kupambana.

Brig Jenerali Rageb anasema silaha hiyo imetengenezwa huko Gaza, akiongeza kuwa vipengele vyake, kama vile silinda ya gesi iliyobanwa, injini ya mwako wa ndani, kamera, na antena za mwongozo, zinaweza kuchuliwa kutoka kwa bidhaa zisizokatazwa na nyenzo zilizorejeshwa.

Karakana zenye uwezo wa uchapishaji wa 3D zinaweza kutengeneza silaha hizi, anaongeza

CHANZO CHA PICHA,AL-QASSAM BRIGADES

Maelezo ya picha,

Wanamgambo wanne wa al-Qassam wakiwa wamebeba torpedo ya 'Al Asef' hadi baharini kwenye video

Wakati video ya Hamas inaonyesha topido ya 'Al Asef', kuna ushahidi mdogo kuhusu ufanisi wake.

Licha ya madai ya matumizi yake tarehe 7 Oktoba, BBC News Arabic haijaweza kuthibitisha ilitumiwa na haijaona au kuthibitisha ushahidi wowote wa uharibifu wa meli za Israel.

Mnamo Mei 2021, Vikosi vya Ulinzi vya Israeli (IDF) vilitoa picha wakidai kuonyesha shambulio kwa kile walichogundua kama manowari ndogo inayojiendesha karibu na ufuo. Walakini, hakuna picha za kifaa zilizoonyeshwa wakati huo.

3. F7 RPG ya Korea Kaskazini

Kirusha guruneti cha F7 RPG kinaangazia video za Hamas za shambulio la Oktoba 7 na mapigano ya ardhini dhidi ya vikosi vya Israeli katika Ukanda wa Gaza.

Kirusha guruneti hiki kinatoka Korea Kaskazini na kina sifa bainifu kama vile mstari mwekundu unaozunguka kichwa cha kombora.

BBC News Arabic imethibitisha uhalisia wa video kadhaa zinazoonyesha wanamgambo wa Hamas wenye silaha wakiwa wamebeba F7 RPG.

CHANZO CHA PICHA,REUTERS

Maelezo ya picha,

kirusha roketi cha Korea Kaskazini F7 kina pete nyekundu ya kipekee na inaonekana mbele ya maonyesho haya ya IDF ya silaha zilizokamatwa.

Kikosi cha Izz al-Din al-Qassam pia kimetoa picha za mapigano zinazoonyesha silaha hii.

Kama sehemu ya onyesho pana la silaha zilizokamatwa, IDF imeonyesha F7 RPG kwa waandishi wa habari, ambayo inasema ni uthibitisho kwamba Hamas imeitumia.

F7 RPG kinajulikana kwa kasi yake ya upakiaji upya haraka na kinafaa sana dhidi ya magari mazito.

Philip Ingram, afisa wa zamani wa ujasusi wa jeshi la Uingereza, anasema wanamgambo wa Hamas wanaonekana kufanyia marekebisho kifaa hicho katika video alizoziona mtandaoni.

Anasema wamebadilisha ganda la kukinga tanki na kuifanya kuwa bomu la muda ambalo linaweza kutumika dhidi ya vikosi vya ardhini.

"Hakuna ushahidi wa moja kwa moja kwamba silaha hizi zilifika Hamas kutoka Korea Kaskazini au kutoka Iran ambayo Korea Kaskazini imekuwa ikisambaza silaha kwa miaka mingi," anaiambia BBC Arabic.

"Hata hivyo, hakuna njia nyingine ya wao kuipata. Hii ndiyo njia ambayo Korea Kaskazini inapata kiasi kikubwa cha fedha zake za kigeni."

Hata hivyo, Pyongyang, kupitia shirika lake rasmi la habari la KCNA, imekanusha vikali madai kwamba Hamas imetumia silaha zake. Utawala wa Korea Kaskazini ulipuuzilia mbali ripoti kama hizo baada ya shambulio la Oktoba 7 kama "uvumi usio na ushahidi na uwongo".

Lakini shirika la habari la serikali ya Korea Kusini mapema Januari liliripoti kwamba shirika lake la ujasusi liliamini kuwa silaha zilizotengenezwa na Korea Kaskazini zilikuwa zinatumiwa na Hamas huko Gaza.

4. Kilipuzi cha 'Shawaz'

Silaha nyingine inayoonekana kwenye video za Hamas kwenye mitandao ya kijamii ni 'The Shawaz', neno la Kiarabu linalomaanisha moto, kilipuzi kilichotengenezwa na Hamas kinachotumiwa kuvizia magari kwa karibu.

Mrengo wa kijeshi wa Hamas umethibitisha kuwa ulizitumia wakati wa mashambulizi ya ardhini ya Israel huko Gaza.

Israel pia imeonyesha idadi kubwa ya silaha hizi kutoka Gaza ambayo inaonyesha juhudi kubwa za uzalishaji wa ndani.

CHANZO CHA PICHA,AL-QASSAM BRIGADES

Maelezo ya picha,

Vikosi vya al-Qassam hapo awali vilishiriki video ya mgodi wa 'Shawaz' kwenye chaneli za mitandao ya kijamii

Mnamo Julai 2023, Vikosi vya al-Qassam vilitoa video inayoonyesha vifaa hivi vya vilipuzi, ambavyo vimeunganishwa na waya.

Bw Ingram anasema Hamas inatumia mfumo ulioboreshwa katika mzozo huu, ambao una uwezo wa kuharibu magari ya kivita ya Israel.

Anasema vifaa hivyo vinajumuisha diski ya chuma, ambayo kawaida hutengenezwa kwa shaba, iliyozama ndani ya vilipuzi.

Baada ya mlipuko, diski ya shaba inabadilika kuwa kifaa chenye makali, ikipenya silaha za magari yaliyolengwa.

Urahisi wa vifaa hivi kupatikana ni tofauti na muundo na matumizi yao tata.

Wakati sehemu yenye changamoto kubwa iko katika kupata na kuunda kwa usahihi diski ya shaba, Hamas imeonyesha uwezo wa kuzitengeneza, anaongeza.

CHANZO CHA PICHA,GETTY IMAGES

Maelezo ya picha,

Mashambulizi ya anga ya Israel huko Gaza yameharibu miundo mingi ambayo Hamas inaweza kutumia kurejesha vifaa vya ujenzi kwa ajili ya silaha

Hamas wanaendeleaje kutengeneza na kupata silaha?

Hamas inayaunda upya mabomu ya Israel ambayo hayajalipuka pamoja na kutumia tena chuma na nyaya kutoka kwa majengo yaliyoharibiwa .

Brig Jenerali Ragheb anasema Iran imesaidia kusafirisha silaha katika Ukanda wa Gaza, huku kukiwa na mahandaki ya siri kwenye mipaka ya Gaza na boti zikijaribu kupenya kwenye vizuizi vya Israel katika Bahari ya Mediterania.

Yasser Hashem, mkuu wa zamani wa jeshi la Misri, anapendekeza udhibiti wa Israel juu ya mipaka yake usiwe kamilifu, akiashiria kuwepo kwa "safu ya kimataifa ya magendo" ambayo inaingia Israel kutoka Lebanon.

Mamlaka ya Israel ilitangaza mnamo Septemba 2022 kwamba ilizuia jaribio la kusafirisha vilipuzi kwenye kivuko cha Kerem Shalom kuelekea Gaza. Vilipuzi hivyo vilifichwa kwenye shehena ya nguo.

Chanzo